勇奪《微電影「創+作」支援計劃（音樂篇）》專業組 – 最佳女主角金獎

難忘寒流下凍到震開工 望着對手戲服只能羨慕

一Shot落鏡頭NG足20次

感激團隊成就得獎 期望再攻大銀幕

葉巧琳（Mischa）自出道以來，事業主力圍繞音樂發展，能作能唱，早獲樂迷認同，她昨日再解鎖多一項成就 – 演戲！Mischa應着主演的微電影《意外》，於昨日舉行的《微電影「創+作」支援計劃》頒獎典禮中，獲頒專業組「最佳微電影女主角金獎」，令Mischa超級開心！該片另獲頒「最佳微電影製作大獎銀獎」及「最佳微電影編劇獎」。

今次是Mischa首次演戲，沒想到「一擊即中」順利封后，她說：「今次係非常之開心可以參與到一個咁好嘅作品，其實我睇緊頒獎嘅時候，見到最佳微電影嘅編劇係我哋得獎時，我已經係超級地開心！因為我真係覺得個故事係好好，同佢最後有好多懸疑嗰啲，原來有咁多Surprise嘅，我覺得係一個非常好嘅劇本。」見到《意外》得獎，她更立即發短訊給自編自導自剪的Paco Wong（王慶南）恭賀。

但Mischa想不到，自己也有份得獎！她坦言對得獎有少許期盼，但當聽到銅獎和銀獎的得主分別是Hana譚杏藍和邵音音時，覺得自己無緣奪金，當宣佈金獎得主時，可想而知Mischa到底有多興奮！「自己都係第一次去演戲，對我嚟講都係一個好新嘅事情，所以真係冇諗過會得到金獎，真係好開心！同埋呢個金獎係真係好多人幫助我先攞到，我收到劇本後，搵咗個acting coach – Yem Yuen (袁綺雯)，佢真係去幫我排，上咗兩堂，盡量去搵下點樣去演得好啲，個角色嘅action應該係點，個inner monologue應該係點，講每句對白裡面或聽人哋對白時個即時反應、個心底話應該點樣去諗，呢啲都有佢去guide我。」Mischa強調，今次成就到得獎，全靠Yem及Paco的指導：「我哋3個一齊去研究，中間個摸索過程都慶幸有佢哋兩個去幫助我，而喺成個電影裡面，其實Paco都一路會guide我去演得會好啲。

獲導演大讚

Paco則感謝Mischa出力：「多謝Mischa一聽到話參加呢個比賽已經勁幫忙，同佢合作係好愉快，開頭我有少少擔心，原來佢冇做過戲，但估唔到佢嘅表現係咁出色，佢嘅表現有一種好從容嘅感覺，呢個係一個演員好應該要有嘅特質，而佢本身天生就有呢樣嘢，可能佢係一個學聲樂出身嘅表演者，佢對情感嘅處理已經好熟悉，所以佢對情感嘅運用非常之輕鬆。」

Paco同時感謝Mischa願意配合，讓他圓願：「我喺拍攝時，一開頭已經決定咗有個一Shot落嘅鏡頭，同咗Mischa講，佢都好願意去配合。我哋排過幾次戲，好多謝阿Yem嘅幫忙，冇咗佢哋嘅配合，我試唔到我想喺影片呈現嘅嘢，係Mischa成就咗《意外》，所以非常之感謝佢！」提到這個一Shot落、約5至6分鐘的鏡頭，讓初次演戲的Mischa吃足20次NG！但Paco笑言是正常表現，Mischa感激導演有耐性，讓她能在無壓力下去完成一個作品。另一方面，Mischa難忘開工那幾天天氣超凍，由於戲服很薄，未埋位時凍到狂震，幸得助手幫手暖腳，而看着其他演員穿着長袖衫褲，只能表示羨慕。而拍炒車戲一劇也令Mischa印象深刻，她笑說：「其實架車係靜止狀態，但我哋要扮碌落山，外面嘅手足一個扮樹枝揈，一個chok架車，我同Alan（陸駿光）喺車入面尖叫，大家都好忙，出到嚟效果都好似好正。」

期待踏足影圈

一直致力音樂發展的Mischa今次解鎖新成就，讓她發現自己或許有更多可能性：「能夠攞到金獎，我覺得好似一個小小嘅承認，係個令到我幾開心嘅一個鼓勵，可能我除咗喺唱歌呢一邊，喺電影上有其他嘅發展，我希望將來亦都有一啲機會可以拍到電影，都會係一個想去踏足到嘅一個層面，再次其實都好想多謝返成個製作團隊，尤其是Paco，去搵一個完全冇電影經驗嘅人去拍。呢個作品攞咗3個獎項，我覺得我哋嘅努力係冇白費。」

而《意外》其實與Mischa的音樂也有關係，她的〈神把眼淚都留給了人〉被選用為劇中曲，她指：「當初寫呢首歌時，係寫俾一個離開咗我嘅朋友，今次可以喺個微電影去用，好似賜予佢另一個生命，我非常之感恩，希望大家睇完多多支持。」

意外 – 第九屆【微電影「創＋作」支援計劃（音樂篇）】: https://youtu.be/UOZchE55Orc