〈跳跳虎 (feat. Chinky Eyes)〉

全新曲風不忘滲入Citypop元素

力臻 Lagchun 為拍MV騷肌　 捱餓拍攝

一直鍾情Citypop的力臻Lagchun，在加入Sony Music旗下全新音樂品牌Green Music後作出新嘗試，以全新曲風，與二人男子組合Chinky Eyes（CE）首度合作Up Beat新歌〈跳跳虎〉，但他仍不忘在音樂中滲入Citypop元素，而為了拍攝MV的騷肌場面，他不惜全日捱餓拍攝，務求以最佳狀態示人。

從表面理解，〈跳跳虎〉由歌名到編曲，都令人想跟著音樂跳彈，但力臻 Lagchun 想表達更深一層的意義。力臻 Lagchun 道：「呢首歌係回應出道歌〈都市爬行〉，嗰首係講我哋慢慢向上爬，但而家嘅我工作愈嚟愈忙，返學讀書、放學去做音樂，感覺就似由一個地方彈去另一個地方，要好急速去處理所有嘅事情，往往會忽略咗人生樂趣，〈跳跳虎〉就係提醒自己同埋聽眾，就算你嘅生活幾繁忙，要記得返人生嘅樂趣，甚至乎係享受彈嚟彈去，活喺好繁忙嘅過程入面，歌詞裡面最後一句：『玩還玩，彈還彈，人生放慢腳步，記住慢慢嘆』，就係想講呢樣嘢。」

今次力臻 Lagchun 跟CE作出全新曲風新嘗試，但他仍念念不忘他至愛的Citypop，所以中段加插了Citypop裡最常見的Retro Funk元素，除此之外，留心細聽，編曲上都混入了紅綠燈訊號、電車、敲打不同物質的聲音在內，力臻 Lagchun 解釋：「Citypop嘅音樂大多滲透生活日常，所以除咗歌詞內容好反映到而家我哋忙碌嘅生活節奏外，我亦將一啲喺呢個城市聽到嘅聲音，放喺呢首歌入面。」

Chinky Eyes ：「我哋都覺得，唔同嘅音樂人都有自己唔同嘅音樂節奏，但當唔同嘅節奏撞埋一齊嘅時候，有時佢哋會好融合，有時又會全部彈開晒，呢首歌就係有呢種瘋癲嘅感覺，癲完之後細心睇吓啲歌詞，你以為佢只係幽默，但又有一啲人生哲理俾大家㗳吓。所以我哋就諗，呢種節奏幾反映到力臻Lagchun嘅常生活吖，呢秒係歌手，下一秒又會係數學老師，教完書放學後又返去大學做返個學生，你話邊個夠佢亂吖。」

過去力臻 Lagchun 拍攝的MV橋段都十分搞鬼，今次亦不例外，為了配合歌名與曲風，他不但一身虎紋Look造型示人，他甚至與CE一齊落力跳唱，不過力臻 Lagchun 謙稱這些只是簡單的Dance Move，而MV中力臻亦毫不吝嗇一騷他那大隻身形，他更為此捱餓拍攝，他說：「導演一早已同我講有啲著少啲衫嘅Shot，所以拍攝當日我全日都冇食嘢，但到唔著衫嘅Shot又放到最尾先拍，所以我到後來已經跳到冇晒力，超級攰，好彩出到嚟效果都靚，值得咁辛苦。」

力臻 Lagchun – 跳跳虎 (feat. Chinky Eyes) – MV

將於今晚9點在力臻 Lagchun YouTube Channel推出: https://Lagchun.lnk.to/JumpJumpJumpftChinkyEyesPR/youtube