陳柏宇難忘婆婆教打麻雀

女兒Abi開金口齊合唱新歌〈懷舊是一種品味〉

共同製造難忘回憶

陳柏宇Jason最近推出了新歌〈懷舊是一種品味〉，借歌曲分享念舊情懷，而日前他現身海港城首度現場獻唱新歌，意外地女兒Abi也大開金口合唱。Jason又分享了自己對於懷舊的睇法，並同時更宣布新碟《in Rhythm》即將面世。

Jason日前在海港城「海運觀點」梯級式看台舉行《懷舊是一種品味之「回憶收賣佬」活動》，在黃昏Magic Hour時份與粉絲見面，獻唱了新歌〈懷舊是一種品味〉、〈一人傍晚藝術館〉及〈金草莓〉外，Jason亦分享了他的一些想法。有很多人會很念舊，總覺得舊的人與事都比現在好，但Jason覺得不妨正向一點，說：「如果係咁嘅話就要轉一轉個心態，要活多啲喺現狀，唔好只係一味覺得舊嘅好啲，要諗辦法令自己覺得而家嘅生活都係有佢嘅好，值得開心。」不過Jason又從另一角度分享懷舊的好，指人都總要有耐性與感性的一面，他說：「耐性同感性一面唔夠嘅時候，可以分享多啲熱血或者懷緬感覺嘅經歷，否則會慢慢喪失人性，因為不論工作或者人與人之間嘅溝通都變得好機械化，尤其喺社交平台上面，好少會睇到一啲好開心，值得鼓舞嘅嘢，成日又踩又鬧，令到我哋唔容易同人connect、願意聽人哋嘅分享。」

Jason亦帶頭分享了他的童年回憶，他說：「我有好多好舊嘅回憶都係同婆婆嘅居多，例如係移民加拿大嘅時候同婆婆一齊去老麥買雪糕，同埋我細個嗰陣佢教我打麻雀。另外仲有太公，讀小學嗰陣，返屋企食lunch經常會有腐乳撈飯，再加蒸豬肉，咁就一餐。我通常會記得同朋友或者同屋企人嘅相處居多，反而唔係擁有過乜嘢物件，或者物件帶比我乜嘢感覺，而家就會同兩個女去製造一啲回憶。」而活動當日，Jason亦與女兒Abi製造了難忘的回憶，已經5歲多的Abi活潑好動，當日Jason拖著她的小手表演了後空翻外，她更在Jason唱出〈懷舊是一種品味〉時跟著合唱，就連Jason也大讚Abi道：「你今日有好大進步喎！唱咗兩句，我以為會笠水but you prove me wrong（但你證明我係錯嘅！）」就在此時，Abi忽然表演一字馬，更問Jason，說：「你得唔得呀？」把Jason也弄得啼笑皆非，只好回答女兒：「我唔得。」場面溫馨又搞笑呢！

在活動中，Jason亦公布了新碟《in Rhythm》將於12月19日推出，出碟前一日更會大搞見面會，與粉絲飯聚聯誼一番，更多詳情，請留意Jason官方社交平台的公布。

立即到各大數碼平台收聽：https://JasonChan.lnk.to/CarlsDate

〈懷舊是一種品味〉MV：https://youtu.be/NXUP3VtS1i4