陳柏宇於三月中開始為疫情打氣而進行的直播 Live《有我 IG Mini Live》系列，而近期疫情亦有回落現象，昨晚 Jason 進行最後一次的《有我 IG Mini Live 》系列直播，特別為於疫情間因患病而在家的人士打氣。經過多次 Live 獻唱，Jason 昨晚為樂迷帶來驚喜，主打演繹自己的歌曲，當中多首更是多年來的滄海遺珠。

昨晚《有我 IG Mini Live》特別為染疫在家人士打氣，Jason 在直播開首即謂：「希望今（昨）晚唱歌俾你哋聽，為你哋打氣，我知一定係辛苦，但你哋要努力、加油！」期間有網民留言表示患上 Omicron後喉嚨痛很辛苦，Jason 即表示：「我好彩向來冇乜喉嚨痛，但會生痱滋，今日都生咗粒痱滋，頭先唱歌都唔小心咬到。有時 Abi (Jason 女兒 Abigail) 會伸手指入去我個口，仲會刮我粒痱滋。」人仔細細的 Abi 也十分調皮呢！

除了因疫情而患病的人士外，Jason 亦聯同 Make-A-Wish Foundation (願望成真基金) 一同為病童及家長打打氣，曾受惠的Brian 亦在 Live 中分享了自己的經歷，說：「我嘅願望係成為遊戲工程師，Make-A-Wish 特別模擬咗見工環境同程序等我體驗外，更聯絡喺香港嘅遊戲公司，安排面試機會，最終得到實習機會，學到好多遊戲製作嘅相關經驗，希望大學畢業後可以再次返去遊戲界，成為遊戲工程師，長遠夢想會係想砌一隻 Game！」Jason 聽到也表示：「我自己都鍾意打機，都好 appreciate (欣賞) 寫 Game 嘅人，希望你有日可以願望成真！」

而昨晚長達兩個多小時的 IG Mini Live 彷如 Jason 的個唱一樣，除了唱出〈永久保存〉、〈親愛的仇人〉、〈拍一半拖〉、〈告別之前〉、〈感情這回事〉、〈別來無恙〉等主打歌外，Jason 還預備了多首side track 如〈二人世界〉、〈Mr. Adult〉、〈對人歡笑〉等與樂迷分享，有些歌曲如〈沒有吻的資格〉、〈On Every Line〉、〈一千種戀愛〉及〈關注我〉即使未有安排，但 Jason 也即興唱半首以滿足大家，不過當有忠粉點唱與洪卓立合唱的〈支柱〉時，Jason 即一頭問號，問：「我有首歌叫〈支柱〉？」一臉狐疑的 Jason 邊思索邊唱出王菀之〈永遠幾遠〉時，樂迷紛紛搞笑留言：「上次先講過同洪卓立拍過微電影」、「話俾立立知」、「好多歌你自己都唔記得hahaha」、「Jason 記憶好似金魚」、「陳伯啲記性世一」、「陳伯唔係浪得虛名嫁 (㗎)」正當樂迷興高采烈地留言之際，Jason 唱罷聽到工作人員告知樂迷的留言後，他即道：「其實即係〈繭〉！首歌喺微電影出現，但製作團隊唔鍾意本身嘅低音，結果升咗 Key 變咗合唱，嗰陣再做一次變咗〈支柱〉。」原來即使歷史久遠的事情，Jason仍然記得當中細節呢！

演唱到最後，Jason 清唱幾句 Sammi 的「捨不得你」作結尾，樂迷亦有留言説捨不得你作回應，Jason 説只是這個定時 Live 直播系列完結，他會繼續不時開 Live 同大家唱歌，下星期會有公布，請樂達密切留意他的社交網絡公布詳情吧！

陳柏宇〈有我 IG Mini Live〉: https://www.instagram.com/tv/Ccao1cUJI15/?utm_source=ig_web_copy_link https://www.instagram.com/tv/Cca1rWjJdZD/?utm_source=ig_web_copy_link